די רייד

344די רייד

פון ליובאַוויטשער רבי'ן שליט"א פאַר אַ גרופּע עסקנים פון דעם מרכז הישיבות תומכי-תמימים ליובאַוויטש

מיטוואָך, פ' האזינו, ה' עשי"ת, תש"י¹

ברוכים הבאים!

איהר אַלע זייט ביי מיר זייער חשוב'ע געסט. אהבת ישראל — האָלט האָבען אַ אידן, איז אַ געבוירענע זאַך ביי יעדער אידיש קינד אָן אונטערשייד צווישען שפל שטאַנד און יחוס שטאַנד.

אונזער אַלגעמיינער טיטול איז יוד, וואָס אַלע ווייסען די הפלאת המעלה פון אות יוד לגבי אַנדערע אותיות אַז אַלע אותיות איז זייער תמונה הויבט זיך אָן מיט דעם נקודת היוד².

צו אונז גזע הוד כ"ק רבינו הזקן איז איבערגעגעבען אַ וואָרט וואָס הוד כבוד קדושת רבינו הזקן האָט מקבל געווען פון זיין רבי'ן הוד כ"ק רבינו המגיד ממעזריטש וועלכער האָט דאָס וואָרט מקבל געווען מהוד כבוד קדושת מורנו הבעל שם טוב.

דער ערשטער אות פון שם הוי' איז דער אות יו"ד ווייל אַ איד איז דער טעם און כוונה פון בריאת העולם, און די תמונה פון אות יו"ד איז מגלה און דערקלערט די כוונה צוליעב וואָס השם יתברך האָט באַשאַפען די וועלט. דער קוץ העליון איז מרמז אויף דער כוונה וואָס עלה ברצונו יתברך צו באַשאַפען דעם עולם הגשמי, און דער קוץ התחתון איז מורה אויף דעם יש הגשמי, און ווען מען פירט דורך אין דעם וועלטליכען גשמיות'דיגען לעבען די כוונה העליונה צוליעב וואָס השם יתברך האָט באַשאַפען די וועלט איז דאָס דער ריכטיקער תמונת היו"ד. יעדער איז לפי מצבו ולפי ענינו, דאָס הייסט לפי העבודה וואָס זיין נשמה בעדאַרף דורכפירען בעלמא דין להצלחה און דער יסוד מוסד איז החזקת לומדי תורה ביראת שמים.

באַ תורה שטייט כי טוב סחרה מכל סחורה³, תורה איז אַ מזומנ'ע סחורה ווי אַ סוחר לויבט זיין סחורה דאַרף איך אייך ניט מבאר זיין. איך האָב אָפטערס געהערט ווי אלטע גרינדליכע סוחרים פירען זיך, ווען איינער קומט צו אַ סוחר און בעט ער זאָל אים געבען סחורה, ער באַדאַרף האָבען אַ היבשע ביסעל ווייל אַלע פרעגען זיך אויף דער דאָזיגער סחורה, ענטפערט דער גרויסער סוחר, וואָס זאָגסטו אויף איהם, ער וויל אַ היבשע ביסעל סחורה, מיין סחורה איז דאָך מיט גאָלד צוגלייך און אַז איך וועל דיר געבן אַ לעק סחורה האָט דאָך דאָס אויך זייער אַסך די ווערט, דו וועסט די ביסעל אויך צוצוקערען, כי טוב סחרה מכל סחורה, דער אמת'ער טוב סחרה מכל סחורה זאָגט ער אויף תורה.

איך בין זייער צופרידען פון אַייער אַרבייט פאַר תורה, איך מיין ניט פון דעם וויפיעל געלט איר גיט, איך ווייס ניט צו איהר גיט גענוג וויפיעל איהר דאַרפט געבען, דאָס דאַרף מען פרעגען ביי דעם מנהל, איך מיין פון אַייער איבערגעבענקייט, דאָס איז העכער פאַר אַלץ.

345איך רייד דאָ ניט פון דעם ענין פון געלט געבען נאָר איך מיין אין דעם וועלען תורה. אַז ביי אייך מאַכט זיך איהר באַגעגענט זיך מיט נאָך אַ אידען דאַרף מען איהם פרעגען וואָס טוסט דו פאַר תורה, איך האָב געלויבט השם יתברך געטאָן דאָס און דאָס און וואָס טוסט דו?

איך רייד דאָס וועגען תורה בכלל און בפרט תומכי תמימים וואָס איז דאָך אַ אַלטער מוסד וואָס דער טאַטע האָט מייסד געווען און מיט טרערען געבעטען דעם אויבערשטען בזכות פון די הייליגע עלטערען ער זאָל מצליח זיין הן צו די תלמידים אין גשמיות און עס זאָל זיך אָנזעהן אין רוחניות און הן פאַר די וואָס וועלען מחזיק זיין תומכי-תמימים, זיי און זייערע בני בית זאָלען מצליח זיין בגשמיות וברוחניות און די ברכה ווערט מקויים בכל עת ובכל זמן.

מיט דעם כח וואָס מען האָט מיר געגעבען אויף צו בענטשען אנ"ש, מחזיקי תורה און אידען בכלל — בענטש איך אייך אַז דער אויבערשטער זאָל אייך אַלעמען געבען אַ שנה טובה ומתוקה, אַ חתימה וגמר חתימה טובה אין אַלע ענינים, אייערע ענינים זאָלען זיין ווי על פי תורה, איהר זאָלט האָבען אַ געשמאַק אין אהבת השם, אהבת התורה און אהבת ישראל.

ברוכים תהיו בגשמיות וברוחניות.